MEXICO CITY – Mwenyeji mwenza wa Kombe la Dunia 2026, Mexico, ameanza vyema kampeni yake ya michuano hiyo baada ya kuichapa Afrika Kusini mabao 2-0 katika mechi ya ufunguzi iliyochezwa kwenye Uwanja wa Estadio Azteca usiku wa Alhamisi.
Julian Quinones aliandika historia kwa kufunga bao la kwanza la Kombe la Dunia 2026 dakika ya tisa ya mchezo, kabla ya mshambuliaji mkongwe Raul Jimenez kuongeza bao la pili kipindi cha pili na kuihakikishia Mexico pointi tatu muhimu katika Kundi A.
Mashabiki zaidi ya 80,000 waliofurika Estadio Azteca walishuhudia Mexico ikitawala mchezo tangu dakika za mwanzo huku Afrika Kusini ikionekana kushindwa kuhimili presha ya mechi hiyo kubwa.
Quinones aliifungia Mexico bao la kwanza baada ya kutumia makosa ya safu ya ulinzi ya Afrika Kusini na kuachia shuti la chini lililompita kipa na nahodha Ronwen Williams.
Mambo yalizidi kuwa magumu kwa Afrika Kusini mwanzoni mwa kipindi cha pili baada ya Sphephelo Sithole kuonyeshwa kadi nyekundu dakika ya 49 kwa kumuangusha Brian Gutierrez aliyekuwa akielekea langoni.
Mexico ilitumia vizuri faida ya kuwa na mchezaji mmoja zaidi uwanjani na kufunga bao la pili dakika ya 67 kupitia Raul Jimenez, ambaye alimalizia kwa kichwa krosi nzuri ya Roberto Alvarado.
Afrika Kusini ilipata pigo jingine dakika ya 84 baada ya Themba Zwane kutolewa kwa kadi nyekundu kufuatia uchunguzi wa VAR uliobaini alimchezea vibaya Alvarado.
Dakika za mwisho za mchezo zilileta drama nyingine baada ya beki wa Mexico Cesar Montes kupewa kadi nyekundu kwa kumchezea vibaya Khulisa Mudau karibu na eneo la hatari.
Ushindi huo unaifanya Mexico kuanza vyema harakati zake za kusaka tiketi ya hatua ya mtoano, huku Afrika Kusini ikibakiwa na kazi kubwa ya kufanya katika mechi zake zinazofuata ili kujiweka kwenye nafasi nzuri ya kusonga mbele.
