Timu ya taifa ya Ujerumani imeanza kwa kishindo kampeni yake ya Kombe la Dunia 2026 baada ya kuichapa Curaçao mabao 7-1 katika mchezo wa Kundi E uliochezwa jijini Houston.

Ujerumani ilionyesha ubora wake tangu dakika za mwanzo huku Felix Nmecha akiandika rekodi ya kufunga bao la haraka zaidi katika mashindano hayo hadi sasa baada ya kutikisa nyavu dakika ya sita pekee.

Mabao mengine ya Wajerumani yalifungwa na Nico Schlotterbeck, Jamal Musiala, Nathaniel Brown, Deniz Undav pamoja na Kai Havertz aliyefunga mabao mawili na kuiongoza timu yake kupata ushindi mkubwa.

Licha ya kipigo hicho kizito, Curaçao waliandika historia yao wenyewe baada ya Livano Comenencia kufunga bao la kwanza kabisa la taifa hilo kwenye Kombe la Dunia katika dakika ya 21. Bao hilo lilishangiliwa kwa nguvu na mashabiki waliokuwa uwanjani, likiwa kumbukumbu muhimu kwa taifa hilo dogo lililoshiriki mashindano hayo kwa mara ya kwanza.

Curaçao pia imeingia kwenye historia kama moja ya mataifa yenye idadi ndogo zaidi ya watu kushiriki Kombe la Dunia, huku kocha wao mkongwe Dick Advocaat akiweka rekodi ya kuwa kocha mwenye umri mkubwa zaidi kuongoza timu katika michuano hiyo akiwa na miaka 78.

Kwa upande wa Ujerumani, ushindi huo umetuma ujumbe kwa wapinzani wao kuwa wako tayari kupambana kwa ajili ya taji la dunia. Kikosi cha Julian Nagelsmann kilitawala mchezo kwa umiliki wa mpira, mashambulizi ya mara kwa mara na ubora wa kiufundi uliowafanya Curaçao kushindwa kuhimili presha.

Kipa mkongwe Manuel Neuer naye aliandika historia kwa kuwa mchezaji mwenye umri mkubwa zaidi kuchezea Ujerumani katika mashindano makubwa akiwa na miaka 40.

Matokeo hayo yanaifanya Ujerumani kuanza kwa pointi tatu muhimu huku Curaçao wakibaki na kumbukumbu ya siku yao ya kihistoria ya kwanza katika Kombe la Dunia licha ya kupokea kipigo kizito.