Jiji kuu la Urusi, Moscow, limekumbwa na kile kinachotajwa kuwa moja ya mashambulizi makubwa zaidi tangu kuanza kwa vita kati ya Urusi na Ukraine, baada ya mamia ya ndege zisizo na rubani (drones) kurushwa kuelekea maeneo mbalimbali ya jiji hilo.
Kwa mujibu wa mamlaka za Urusi, takriban ndege 200 zisizo na rubani za Ukraine zilihusika katika shambulio hilo, huku moshi mzito ukionekana katika baadhi ya maeneo ya Moscow na viunga vyake.
Gavana wa Mkoa wa Moscow, Andrei Vorobyov, amesema watu 17 walijeruhiwa kutokana na mashambulizi hayo, huku vikosi vya ulinzi vya Urusi vikifanya operesheni za kukabiliana na mashambulizi hayo kwa saa kadhaa.
Wizara ya Ulinzi ya Urusi imedai kuwa katika kipindi cha saa 24 zilizopita, ilifanikiwa kunasa na kuharibu karibu ndege zisizo na rubani 1,000 pamoja na makombora manne yaliyokuwa yakielekezwa katika maeneo mbalimbali nchini humo.
Mbali na Moscow, shambulio jingine liliripotiwa kulenga hifadhi ya mafuta katika eneo la Rostov kusini mwa Urusi, ambapo mtu mmoja alifariki dunia baada ya miundombinu hiyo kushambuliwa.
Kwa upande wake, Rais wa Ukraine, Volodymyr Zelensky, amethibitisha kuwa vikosi vya Ukraine vilifanya mashambulizi dhidi ya eneo la Moscow kwa kutumia silaha za masafa marefu.
Zelensky amesema operesheni hiyo ilikuwa sehemu ya mkakati wa kujibu mashambulizi yaliyofanywa na Urusi dhidi ya mji mkuu wa Ukraine, Kyiv, wiki iliyopita.
“Wakati wa kumaliza vita hivi umewadia, na Urusi lazima ichukue hatua zinazohitajika za kidiplomasia,” alisema Zelensky.
Mashambulizi hayo yanaashiria kuongezeka kwa mapigano kati ya pande hizo mbili, huku kila upande ukiendelea kutekeleza mashambulizi ya masafa marefu katika maeneo muhimu ya kijeshi na kiuchumi ya mpinzani wake.
Vita kati ya Urusi na Ukraine vinaendelea kuingia katika hatua mpya, huku mashambulizi ya ndege zisizo na rubani yakionekana kuwa sehemu muhimu ya mbinu za kivita zinazotumiwa na pande zote mbili.
