Iran imeendelea kuongeza joto la kisiasa na kiusalama baada ya kutoa onyo kali kwa Marekani na Israel, ikisema itajibu kwa nguvu dhidi ya shambulio lolote wakati nchi hiyo ikiandaa mazishi ya kiongozi wake mkuu.
Kwa mujibu wa taarifa ya kamanda wa kijeshi wa Iran, Ali Abdollahi, nchi hiyo imewaonya maadui wake kujiepusha na “makosa ya kimahesabu” na kusema vikosi vyao vya ulinzi viko tayari kujibu kwa ukali dhidi ya tishio lolote.
Kauli hiyo imekuja wakati Iran ikiendelea na maandalizi ya mazishi ya kiongozi wake mkuu, huku viongozi mbalimbali wa kimataifa wakitarajiwa kushiriki. Serikali ya Pakistan imethibitisha kuwa Waziri Mkuu Shehbaz Sharif atahudhuria mazishi hayo.
Vilevile, China imetangaza kuwa mwakilishi wake mkuu katika bunge la taifa, He Wei, atahudhuria, huku India ikisema itawakilishwa na Naibu Waziri wa Mambo ya Nje pamoja na Gavana wa Bihar, Syed Ata Hasnain.
Mazishi ya kiongozi huyo yanatarajiwa kuanza Julai 4 mjini Tehran na kumalizika Julai 9 katika mji wa Mashhad, huku shughuli nyingine za maombolezo zikifanyika Qom na Iraq.
Wakati huo huo, maafisa wa Iran wameendelea kutoa onyo kuwa watajibu kwa haraka na kwa nguvu dhidi ya vitisho vyovyote, huku hatua kali za kiusalama zikiwekwa katika miji mbalimbali ikiwemo Tehran na Mashhad.
Mvutano huo unaendelea kuibua hofu ya ongezeko la taharuki ya kisiasa katika eneo la Mashariki ya Kati, huku dunia ikiendelea kufuatilia kwa karibu maendeleo ya tukio hilo.
