Maafisa wa Polisi wa Los Angeles (LAPD) wameieleza mahakama kuwa walikuta kifaa kinachoitwa “burn box” nyumbani kwa msanii D4vd, wakati wa upekuzi uliofanyika Septemba 17, 2025, kufuatia uchunguzi wa kifo cha Celeste Rivas Hernandez.
Akitoa ushahidi katika kikao cha awali cha mahakama Julai 21, 2026, mpelelezi wa LAPD Joshua Byers alisema kifaa hicho kilipatikana nyuma ya kinanda (piano) ndani ya nyumba ya msanii huyo katika eneo la Hollywood Hills.
Kwa mujibu wa ushahidi huo, “burn box” ni kifaa kinachoweza kutumika kuchoma vitu hadi kuteketea kabisa. Waendesha mashtaka wanadai kifaa hicho kilinunuliwa kupitia Amazon siku chache baada ya kuaminiwa kuwa Celeste aliuawa mwezi Aprili 2025.
Mbali na kifaa hicho, upande wa mashtaka unadai D4vd alinunua pia misumeno miwili ya umeme (chainsaws), mfuko wa kubebea mwili, bwawa la plastiki linalopulizwa hewa na mifuko mikubwa ya taka.
Msanii huyo mwenye umri wa miaka 21 anakabiliwa na mashtaka kadhaa, yakiwemo mauaji, unyanyasaji wa kingono wa mtoto chini ya miaka 14 kwa kipindi kirefu, pamoja na kuharibu mwili wa marehemu kinyume cha sheria. D4vd amekana mashtaka yote.
Waendesha mashtaka wanadai Celeste aliuawa Aprili 23, 2025, baada ya kutokea mabishano kati yake na D4vd. Pia wanadai wawili hao walifahamiana tangu mwaka 2022 wakati Celeste akiwa na umri wa miaka 11, na baadaye kuingia katika uhusiano wa kimapenzi alipokuwa na miaka 13.
Kwa mujibu wa upande wa mashtaka, mwili wa Celeste ulipatikana ukiwa umehifadhiwa kwenye mifuko ndani ya gari la Tesla lililokuwa limehifadhiwa katika eneo la kuhifadhi magari yaliyokamatwa.
Kesi hiyo bado ipo mahakamani, na hakuna hukumu iliyotolewa. D4vd anaendelea kuchukuliwa kuwa hana hatia hadi pale mahakama itakapotoa uamuzi wa mwisho.
