Waziri Mkuu wa Israel, Benjamin Netanyahu, amewasili nchini Marekani kwa ziara rasmi ambapo anatarajiwa kufanya mazungumzo ya ana kwa ana na Rais wa Marekani, Donald Trump, ikiwa ni mkutano wao wa kwanza tangu kuanza kwa mvutano wa kijeshi kati ya Marekani, Israel na Iran.
Huu utakuwa mkutano wa nane kati ya viongozi hao tangu Trump arejee madarakani, na wa kwanza tangu mwezi Februari, kabla ya Israel na Marekani kuanzisha operesheni ya pamoja ya mashambulizi ya anga dhidi ya Iran.
Akizungumza kabla ya kuondoka kuelekea Marekani, Netanyahu alisema mazungumzo yao yatajadili masuala mbalimbali ya kikanda, huku akisisitiza kuwa suala la Iran litapewa kipaumbele.
“Katika nyakati hizi ngumu, ni lazima kuchukua hatua kwa uthabiti mkubwa na busara. Tutajadili masuala yote yaliyo mezani, hasa Iran. Lengo letu ni kulinda usalama wetu na pia kupanua wigo wa amani katika eneo letu,” alisema Netanyahu.
Ziara hiyo inafanyika baada ya Marekani kusitisha kampeni yake ya mabomu dhidi ya Iran iliyodumu kwa takribani wiki mbili. Kufuatia hatua hiyo, Iran ilitangaza kuwa itasitisha mashambulizi yake dhidi ya maslahi ya Marekani kwa muda ambao usitishaji huo utaendelea, huku Israel ikionya kuwa shambulio lolote kutoka Iran litajibiwa kwa nguvu.
Katika wiki za hivi karibuni, Netanyahu amekiri kuwa yeye na Trump wamekuwa na tofauti za kimtazamo kuhusu baadhi ya masuala ya Mashariki ya Kati, jambo lililoonyesha kuwa maslahi ya Israel na Marekani wakati mwingine hayaendani.
Taarifa zilizowahi kuvuja mwezi Juni zilidai kuwa katika mazungumzo ya simu, Trump alimkosoa vikali Netanyahu, hali iliyoonyesha kuwepo kwa mvutano kati ya viongozi hao wawili.
Katika hatua inayoonekana kuunga mkono mpango wa Trump wa amani, Israel ilitangaza kuwa itaruhusu kikosi cha kimataifa cha usalama kuingia Gaza, huku pia ikitangaza kuwa imepunguza baadhi ya wanajeshi wake kusini mwa Lebanon kufuatia makubaliano yaliyoungwa mkono na Marekani.
Wachambuzi wa siasa wanaamini kuwa mkutano huo unaweza kumsaidia Netanyahu kisiasa nchini Israel, ambako anajiandaa kwa uchaguzi mkuu wa Oktoba 27 huku akipambana na kushuka kwa umaarufu katika tafiti za maoni. Aidha, mkutano huo unafanyika wakati kiwango cha uungwaji mkono kwa Israel nchini Marekani kikiendelea kupungua.
