Glasgow, Scotland – Safari ya bondia wa Uganda, Aziz Abdul, mjukuu wa aliyekuwa rais wa Uganda Idi Amin, ya kuwania medali ya dhahabu katika Mashindano ya Ndondi ya Jumuiya ya Madola imefikia tamati baada ya kutolewa kwa kufungiwa kufuatia kumgonga kwa kichwa mpinzani wake.
Aziz aliondolewa kwenye pambano la robo fainali la uzani wa super-heavyweight dhidi ya bondia wa England, Damar Thomas, baada ya mwamuzi kumtoa kufuatia makosa ya mara kwa mara yaliyokiuka kanuni za mchezo.
Katika raundi ya kwanza, Aziz alianza vizuri kwa kupiga makonde kadhaa ya kushoto, lakini baadaye alihesabiwa baada ya kupigwa ngumi safi na mpinzani wake. Katika raundi ya pili, alipokonywa alama kutokana na kuendelea kumpiga Thomas wakati mwamuzi alikuwa ametenganisha mabondia hao.
Hatimaye, katikati ya raundi ya tatu, Aziz alipewa onyo la mwisho na kuondolewa rasmi baada ya kumgonga Thomas kwa kichwa, hatua iliyozua kelele za mashabiki waliokuwepo ukumbini.
Baada ya pambano hilo, Aziz alipinga uamuzi wa mwamuzi akidai haukuwa wa haki.
“Sikubaliani na uamuzi wa mwamuzi na sifurahishwi nao. Nafikiri haukuwa wa haki kwa sababu mabondia wa England pia walifanya makosa mengi,” alisema Aziz.
Kabla ya mashindano hayo, Aziz alikuwa amesema ana ndoto ya kuwa “Mfalme mpya wa Scotland”, akirejea kauli maarufu ya babu yake, Idi Amin, aliyewahi kujitangaza kuwa “Mfalme wa Scotland” mwaka 1976. Hata hivyo, ndoto hiyo imefikia mwisho baada ya kuondolewa kwenye mashindano.
