Mwanamichezo maarufu wa kupanda milima kutoka Nepal, Nirmal “Nimsdai” Purja, amefariki dunia akiwa na umri wa miaka 43 baada ya kukumbwa na anguko la theluji (avalanche) kwenye mlima wa Broad Peak nchini Pakistan.
Taarifa ya kifo chake ilithibitishwa na kampuni yake ya Elite Expeditions pamoja na Waziri Mkuu wa Nepal, baada ya Purja kuwa sehemu ya msafara wa wapandaji 10 uliokumbwa na janga hilo Julai 30.
Katika taarifa yake, Elite Expeditions ilisema imepokea kwa masikitiko makubwa taarifa za kifo cha Purja pamoja na baadhi ya washirika wake wa kupanda milima waliokuwa kwenye msafara huo.
Purja alijipatia umaarufu mkubwa duniani baada ya kuweka rekodi ya kupanda milima yote 14 yenye urefu wa zaidi ya mita 8,000 duniani ndani ya kipindi cha miezi saba pekee, mafanikio yaliyoonyeshwa kwenye filamu ya Netflix ya mwaka 2021, “14 Peaks: Nothing Is Impossible.”
Kabla ya kuwa mpandaji maarufu wa milima, Purja aliwahi kutumikia katika Jeshi la Uingereza, ambako alipata uzoefu mkubwa wa mazingira magumu na mafunzo ya kijeshi.
Waziri Mkuu wa Nepal, Balendra Shah, alithibitisha kifo chake na kusema dunia imepoteza mpandaji mwenye historia kubwa, huku akieleza kuwa ujasiri, kujitolea na mchango wa Purja utaendelea kuhamasisha vizazi vijavyo.
Msafara huo ulianza kupanda mlima Broad Peak Julai 29, lakini mawasiliano nao yalipotea siku iliyofuata baada ya kufikia eneo lenye urefu wa takribani mita 6,660. Baadaye iliripotiwa kutokea kwa anguko la theluji katika eneo hilo.
Broad Peak, uliopo katika safu ya milima ya Karakoram kati ya Pakistan na China, una urefu wa zaidi ya mita 8,000 na ni miongoni mwa milima hatari zaidi duniani kwa wapandaji.
Kifo cha Nirmal Purja kimeacha pengo kubwa katika ulimwengu wa wapandaji milima, huku akiacha historia ya kipekee kama mmoja wa wapandaji waliovunja rekodi kubwa zaidi katika historia ya mchezo huo.
