Mshambuliaji mpya wa Yanga, Peter Shalulile, amesema uamuzi wake wa kuondoka Mamelodi Sundowns na kujiunga na mabingwa hao wa Tanzania ni hatua muhimu katika maisha yake ya soka, akifananisha uhamisho wake na ule wa Cristiano Ronaldo alipohama Real Madrid.
Shalulile aliyasema hayo mara baada ya kuwasili nchini Tanzania usiku wa kuamkia leo, Agosti 4, 2026, ambapo alipokelewa na viongozi pamoja na mashabiki wa Yanga waliompa mapokezi makubwa.
Akizungumza na waandishi wa habari, mshambuliaji huyo aliwashukuru mashabiki wa Yanga kwa mapenzi na sapoti waliomuonyesha tangu alipowasili, akieleza kuwa ameguswa na namna walivyompokea.
“Nimefurahishwa sana na mapokezi niliyopata. Nawashukuru mashabiki wa Yanga kwa upendo wao. Kuondoka Mamelodi Sundowns ni sehemu ya safari yangu ya soka, kama ilivyokuwa kwa Ronaldo alipoondoka Real Madrid. Ninaamini kujiunga na Yanga ni uamuzi sahihi kwangu,” alisema Shalulile.
Kwa upande wake, Rais wa Yanga, Eng. Hersi Said, amesema usajili wa Shalulile ni hatua kubwa si kwa klabu hiyo pekee bali pia kwa maendeleo ya soka la Tanzania.
“Ujio wa Peter Shalulile ndani ya Yanga si heshima kwa klabu yetu tu, bali ni heshima kwa soka la Tanzania kwa ujumla. Huu ni ushahidi kuwa Yanga imeendelea kujijengea hadhi na ushawishi mkubwa katika soka la Afrika, kiasi cha kuvutia wachezaji wenye hadhi kubwa barani,” alisema Hersi.
Shalulile anatarajiwa kujiunga na kikosi cha Yanga kwa maandalizi ya msimu mpya, huku mashabiki wakitarajia kuona mchango wake katika mashindano ya ndani na yale ya kimataifa.
