Mkuu wa Shirika la Haki za Kibinadamu la Umoja wa Mataifa, Volker Türk, amesema takribani watu 56 wameuawa kwa kunyongwa nchini Iran tangu mwezi Machi kwa makosa yanayohusiana na usalama wa taifa.
Kwa mujibu wa taarifa za mamlaka za Iran, kati ya watu hao, 27 walihukumiwa kwa kesi zilizohusishwa na maandamano yaliyofanyika mwezi Januari.
Türk amesema kuwa tangu kuanza kwa vita, kumekuwa na ongezeko la hukumu za kifo na utekelezaji wake nchini Iran, hali ambayo amesema inaleta wasiwasi mkubwa kuhusu haki za binadamu.
Ameitaka serikali ya Iran kusitisha mara moja utekelezaji wa hukumu za kifo na kuondoa kabisa adhabu hiyo.
Wakati huo huo, mkuu wa mahakama nchini Iran ameripotiwa kuwataka waendesha mashtaka kuhakikisha kesi dhidi ya watu waliokamatwa wakati wa maandamano ya Januari pamoja na waliokamatwa baada ya vita vya siku 40 zinashughulikiwa kwa haraka na kutoa hukumu bila kuchelewa.
Taarifa hiyo imeongeza mjadala wa kimataifa kuhusu matumizi ya hukumu ya kifo nchini Iran na namna mamlaka zinavyoshughulikia kesi zinazohusishwa na usalama wa taifa.
