Mshambuliaji wa Manchester City, Erling Haaland, ametunukiwa vyeti vinne vya Guinness World Records baada ya kuweka rekodi mbalimbali za kipekee katika soka la ndani na kimataifa.
Mshambuliaji huyo wa Norway, mwenye umri wa miaka 26, ametambuliwa kutokana na mafanikio yake katika Ligi Kuu ya England, UEFA Champions League na UEFA Nations League, akionyesha kasi yake ya kipekee katika kufunga mabao.
Miongoni mwa rekodi zilizompa Haaland heshima hiyo ni kuwa mchezaji aliyefikisha mabao 100 ya Premier League kwa haraka zaidi, rekodi aliyoifikia baada ya kucheza mechi 111 pekee.
Haaland alifikisha mabao hayo 100 katika mchezo dhidi ya Fulham, Desemba 2, 2025, baada ya kufunga kwa mkwaju wa penalti na kuweka historia mpya katika ligi hiyo.
Mbali na rekodi hiyo, Haaland pia ametambuliwa kwa kufunga mabao mengi zaidi katika msimu mmoja wa Premier League, huku kasi yake ya kufumania nyavu ikiwa moja ya sababu kubwa zinazomfanya kuwa miongoni mwa washambuliaji hatari zaidi duniani.
Rekodi nyingine ni kuwa mfungaji bora wa muda wote wa UEFA Nations League, pamoja na kufunga idadi inayolingana na rekodi ya mabao mengi zaidi yaliyowahi kufungwa na mchezaji mmoja katika mchezo wa UEFA Champions League.
Kutunukiwa vyeti hivyo vinne kunaongeza heshima katika safari ya Haaland, ambaye tangu alipowasili Manchester City ameendelea kuvunja rekodi na kuweka viwango vipya katika soka la Ulaya na England.
Kwa umri wake bado mdogo, Haaland anaendelea kuwa miongoni mwa wachezaji wanaotajwa kuwa na nafasi kubwa ya kuweka rekodi zaidi katika miaka ijayo, hasa kutokana na uwezo wake wa kufunga mabao kwa kasi kubwa.
