SAMBURU, KENYA: Mkurugenzi Mkuu wa Idara ya Usalama wa Taifa wa Ecuador, Michele Sensi Contugi, na mkewe ni miongoni mwa watu saba waliofariki dunia baada ya helikopta kuanguka katika eneo la Mlima Ololokwe, Kaunti ya Samburu nchini Kenya.
Ajali hiyo imetokea Agosti 19, 2026, huku taarifa zikieleza kuwa Contugi alikuwa nchini Kenya kwa mapumziko.
Mamlaka ya Usafiri wa Anga Kenya (KCAA) imethibitisha kutokea kwa ajali hiyo, ikisema helikopta iliyohusika ilikuwa aina ya Eurocopter EC130 B4, yenye usajili 5Y-GYM.
Kwa mujibu wa KCAA, helikopta hiyo ilikuwa ikitoka Loisaba kuelekea Ewasonyiro wakati ilipoanguka majira ya saa 3:13 asubuhi kwa saa za Afrika Mashariki.
Wamarekani watano wafariki
Ajali hiyo pia imesababisha vifo vya raia watano wa Marekani, huku Ubalozi wa Marekani nchini Kenya ukithibitisha vifo hivyo.
Taarifa kutoka Televisheni ya Telemundo pia zimeeleza kuwa mmoja wa waliopoteza maisha ni Jose Suarez, ambaye alikuwa kiongozi katika taasisi hiyo ya habari.
Ripoti za polisi zimetaja helikopta hiyo kwa jina la Lady Lorry, ikieleza kuwa ilikuwa ikisafiri kutoka Soyian-Laikipia kuelekea Loisaba Conservancy kabla ya kuanguka.
Waliotajwa kufariki katika ajali hiyo ni rubani Josh Outran pamoja na Roger Duarte, Adam Navaty, Stephen Vasconquez, Henry Parra, Michele Sensi Contugi na Jose Suarez.
Wasiwasi kuhusu chanzo cha ajali
Ajali hiyo imeibua wasiwasi katika duru za siasa za kimataifa kutokana na uwepo wa Mkurugenzi Mkuu wa Usalama wa Taifa wa Ecuador miongoni mwa waliokuwemo ndani ya helikopta hiyo.
Baadhi ya ripoti zimeibua uwezekano kwamba huenda ajali hiyo ilikuwa tukio lililopangwa au shambulio lililolenga Contugi, ingawa hakuna ushahidi uliotolewa hadharani hadi sasa kuthibitisha madai hayo.
Uchunguzi wa mamlaka za Kenya unatarajiwa kubaini chanzo halisi cha ajali hiyo.
Moshi mzito na moto waonekana eneo la tukio
Kamanda wa Polisi wa Kaunti ya Samburu, David Nkoroi, amesema moshi mzito ulionekana katika eneo la ajali baada ya helikopta hiyo kuanguka.
Mashuhuda wa tukio hilo wameripoti kuona moshi mweusi pamoja na moto mkubwa, hali iliyowafanya wakazi kutoa taarifa na kuchochea hatua za haraka kutoka kwa vyombo vya usalama na timu za uokoaji na matibabu.
Vikosi vya uokoaji vilifika katika eneo la tukio kwa ajili ya kushughulikia ajali hiyo na kuanza taratibu za uchunguzi.
Mamlaka za Kenya zinaendelea na uchunguzi ili kubaini mazingira yaliyosababisha helikopta hiyo kuanguka.
