Mtayarishaji wa maudhui mtandaoni anayefahamika kwa jina la Carrymastory ameeleza kushtushwa na hatua ya kisheria anayodai kuchukuliwa dhidi yake na mwanamitindo na msanii Hamisa Mobetto, akidai ametakiwa kulipa fidia ya Sh milioni 600 kutokana na video aliyochapisha mwaka 2023.
Kupitia ujumbe aliouchapisha Septemba 17, 2026, Carrymastory amesema kilichomuumiza zaidi si kiasi cha fedha kinachodaiwa, bali ni kile alichodai kuwa ni kusahaulika kwa miaka yote aliyokuwa akimuunga mkono Hamisa katika nyakati mbalimbali.
“Leo nimeamini msemo wa wahenga, sura sio roho. Septemba hii 2026 Hamisa Mobetto amenifungulia kesi ya madai mahakamani kutaka nimlipe fidia ya milioni 600 kwa video clip ya mwaka 2023, ambapo bado nilikuwa shabiki yake,” ameandika.
Carrymastory amehoji kwa nini hatua hiyo haikuchukuliwa mwaka 2023 endapo video hiyo ilikuwa na tatizo, akisema amekaa takribani miaka mitatu bila kupata taarifa kuhusu madai hayo.
Amesema alilia usiku kucha baada ya kupokea taarifa hizo, akieleza kuwa maumivu yake yanatokana zaidi na hisia kwamba juhudi zake za zaidi ya miaka minane za kumuunga mkono Hamisa hazikutambuliwa.
Kwa mujibu wa Carrymastory, licha ya kumtetea Hamisa na kumpa nafasi kupitia mitandao ya kijamii, hakuwahi kupata msaada kutoka kwake, hata katika kipindi ambacho yeye pamoja na timu yake walikuwa wakimtafutia nafasi za mahojiano.
Pia amekumbusha kipindi ambacho Hamisa alikumbwa na lawama na mashambulizi kwenye mitandao ya kijamii kufuatia kusambaa kwa video zake akiwa na Diamond Platnumz, wakati Diamond akiwa kwenye uhusiano na Zari.
Carrymastory amedai kuwa wakati huo alisimama upande wa Hamisa na kumtetea licha ya yeye mwenyewe kukumbana na matusi na shutuma kutokana na msimamo wake.
“Sijawahi kumpambania star yoyote hivi. Asilimia 80 ya wanawake Watanzania walikuwa wanamchukia kwa hizo video. Mnakumbuka hii vita? Kweli? Hiyo tabia haiwapendezi wengi, ila nilisimama naye, leo hii kasahau kabisa,” ameandika.
Katika sehemu nyingine ya ujumbe wake, Carrymastory amedai kuwa kwa muda mrefu amekuwa akitetea madai kuhusu Dylan, akidai kuwa ni mtoto halali wa Diamond Platnumz.
Hata hivyo, madai ya kufunguliwa kesi na kiasi cha Sh milioni 600 ni maelezo yaliyotolewa na Carrymastory katika ujumbe wake; upande wa Hamisa Mobetto haujaelezwa katika taarifa hii.
