SINGIDA, Oktoba 17, 2026 — Kampuni ya kimataifa ya QNET imekanusha kuhusika na madai ya kuwalaghai vijana 125 kutoka mikoa 11 nchini, waliodaiwa kushawishiwa kutoa fedha kwa ahadi za ajira na mafanikio ya haraka ya kifedha mkoani Singida.
Katika taarifa iliyotolewa kwa vyombo vya habari, Meneja Mkuu wa Kanda ya Afrika Mashariki na Kusini wa QNET, Jared Thwaits, amesema watu wanaodaiwa kuendesha shughuli hizo kwa kutumia jina la kampuni hiyo si Wasambazaji Huru waliosajiliwa na QNET, hivyo kampuni haina uhusiano rasmi nao.
Thwaits amesema kampuni hiyo imesikitishwa na taarifa kuhusu tukio hilo, hususan kutokana na madhara yanayoweza kuwakumba vijana hao pamoja na familia zao. Aidha, amelaani vitendo vya udanganyifu na unyonyaji wa kifedha vinavyodaiwa kufanyika.
Kwa mujibu wa taarifa zilizoripotiwa na chombo kimoja cha habari nchini, vijana hao wanadaiwa kushawishiwa kutoa fedha baada ya kuahidiwa nafasi za ajira na mafanikio ya haraka ya kifedha. Baadhi yao pia wanadaiwa kuishi katika mazingira yasiyofaa, hali iliyosababisha mamlaka za eneo hilo kuingilia kati.
Akizungumzia madai hayo, Thwaits amesema ni muhimu kubaini watu waliohusika, uhusiano wao halisi na kampuni pamoja na iwapo walikuwa na mamlaka ya kuiwakilisha.
“Ni lazima tubaini nani anahusika, uhusiano wao halisi ni upi, na kama walikuwa wameidhinishwa kuiwakilisha kampuni. Madai ya vitendo visivyo halali lazima yafanyiwe uchunguzi wa kina, na uwajibikaji unapaswa kutegemea ukweli uliothibitishwa,” amesema Thwaits.
Ameongeza kuwa QNET inapinga vitendo vya udanganyifu na upotoshaji wa mfumo wake wa biashara, akisisitiza kuwa vitendo hivyo haviendani na dhamira ya kampuni ya kukuza ujasiriamali unaozingatia maadili.
QNET yafafanua mfumo wake wa biashara
Thwaits amesema mfumo wa biashara wa QNET unategemea mauzo ya bidhaa kupitia Wasambazaji Huru na si uuzaji wa nafasi za ajira au kuwaahidi watu mapato ya uhakika.
Amesisitiza kuwa kampuni hiyo haitoi ajira kwa malipo ya ada za usajili, wala hairuhusu mtu yeyote kukusanya fedha kwa kutumia ahadi za ajira au utajiri wa haraka.
Kwa mujibu wa Thwaits, QNET imekuwa ikiendesha biashara katika masoko mbalimbali duniani kwa zaidi ya miaka 28, hivyo ni muhimu kuhakikisha kuwa watu wanaotumia jina lake wanafanya hivyo kwa uhalali na kwa kuzingatia taratibu zinazotakiwa.
Kampuni kuishirikisha mamlaka katika uchunguzi
Katika hatua nyingine, QNET imesema iko tayari kushirikiana na mamlaka husika katika uchunguzi wa tukio hilo ili kusaidia kubaini ukweli na kuhakikisha hatua stahiki zinachukuliwa dhidi ya waliohusika.
Kampuni hiyo pia imewahimiza wananchi kuthibitisha uhalali wa fursa zinazotolewa na watu wanaojitambulisha kuwa wawakilishi wake kupitia njia rasmi za mawasiliano kabla ya kufanya malipo au kuingia katika makubaliano yoyote ya kibiashara.
Tukio hilo linaibua umuhimu wa wananchi kuwa makini na ahadi za ajira au mafanikio ya kifedha zinazotolewa kwa masharti ya kulipa fedha, huku uchunguzi wa mamlaka husika ukiwa muhimu katika kubaini ukweli na kuwawajibisha wote watakaothibitika kuhusika.
Hadi kutolewa kwa taarifa hiyo, madai kuhusu tukio la Singida na uhusiano wa watu wanaotuhumiwa na QNET yanahitaji kuthibitishwa kupitia uchunguzi wa mamlaka husika.
