Rais wa Ukraine, Volodymyr Zelensky, ameishutumu Urusi kwa kutumia makombora ya balistiki yenye vichwa vya mabomu ya vishada katika mashambulizi yaliyofanyika usiku wa kuamkia Oktoba 23, 2026, mjini Kyiv na maeneo mengine nchini humo.
Kwa mujibu wa Wizara ya Mambo ya Kigeni ya Ukraine, watu wanne wameuawa katika mashambulizi hayo, huku Zelensky akisema wengine 34, wakiwemo watoto watano, wamejeruhiwa.
Katika taarifa yake kupitia mtandao wa X, Zelensky alisema Urusi ilirusha makombora matatu ya balistiki yenye vichwa vya mabomu ya vishada dhidi ya Kyiv, pamoja na kutumia silaha nyingine.
Alieleza kuwa makombora hayo yana uwezo wa kulipuka yakiwa angani karibu na shabaha na kusambaza vilipuzi vidogo katika eneo pana, jambo linaloweza kusababisha madhara makubwa kwa watu na mali.
Mabomu ya vishada ni silaha zinazotawanya vilipuzi vidogo katika eneo kubwa. Baadhi ya vilipuzi hivyo vinaweza kutolipuka mara moja na kuendelea kuwa hatari kwa raia hata baada ya mapigano kumalizika.
Matumizi ya silaha hizo yamedhibitiwa na Mkataba wa Mabomu ya Vishada wa mwaka 2008, unaopiga marufuku matumizi, uzalishaji, uhamishaji na uhifadhi wa silaha hizo kwa nchi zilizo wanachama wa mkataba huo.
Hata hivyo, Urusi na Marekani si miongoni mwa nchi zilizotia saini mkataba huo.
