Riot Rose, mtoto wa mastaa wa muziki Rihanna na A$AP Rocky, ameanza safari yake kwenye ulimwengu wa mitindo kwa kishindo baada ya kuonekana kwa mara ya kwanza kwenye majalada ya jarida maarufu la mitindo la Arena Homme+.
Riot Rose Mayers, mwenye umri wa miaka mitatu, amepewa heshima ya kuonekana kwenye majalada sita tofauti ya jarida hilo, hatua iliyomfanya mama yake, Rihanna, kujivunia mafanikio ya mwanaye.
Rihanna alishiriki picha zote sita kupitia ukurasa wake wa Instagram na kuambatanisha ujumbe mfupi uliosomeka, “RIOT ROSE. Arena Homme+ Issue 66.”
Katika moja ya picha hizo, Rihanna anaonekana akiwa amemshika mwanaye huku akiwa amevalia vazi jekundu la Loewe, ambalo pia alilivaa mwaka 2023 wakati wa onyesho la Super Bowl ambapo alifichua ujauzito wake. Riot naye anaonekana akiwa amevalia suti nyeusi na viatu rasmi.
Baba wa mtoto huyo, rapa A$AP Rocky, ambaye jina lake halisi ni Rakim Athelston Mayers, alikuwa amedokeza kuhusu ujio wa kazi hiyo ya mwanaye katika mahojiano na jarida la The Cut mwezi Septemba.
Alisema mmoja wa watoto wake alikuwa na shughuli ya kupiga picha za mitindo siku chache kabla ya siku yake ya kuzaliwa na kwamba alikuwa na furaha kubwa kuona mwanaye akipata nafasi ya kwanza ya kuonekana kwenye jalada la jarida.
Rocky aliongeza kuwa inashangaza kuona watoto wake wakikua na kuanza kujenga tabia, haiba na mitindo yao wenyewe.
Mbali na mafanikio yake kwenye ulimwengu wa mitindo, Riot pia ameanza kuonesha kuvutiwa na muziki wa baba yake.
Katika mahojiano na Rolling Stone yaliyochapishwa Oktoba 16, A$AP Rocky alimsifu mwanaye akimuelezea kuwa mtoto mwenye uchangamfu, udadisi na haiba kubwa.
Alisema Riot ni miongoni mwa watoto wake wanaopenda kujichanganya zaidi na watu, huku akionesha shauku ya kujua kuhusu muziki na shughuli za baba yake.
Katika tamasha la Rocky lililofanyika Septemba 18 katika ukumbi wa Royal Arena jijini Copenhagen, Denmark, Riot alijiunga na baba yake jukwaani huku Rihanna akishuhudia na kuimba kwa furaha.
Rocky alijitolea wimbo kwa ajili ya mwanaye na familia yake huku akiwa amembeba Riot na kutumia kipaza sauti. Pia alijaribu kumshawishi mtoto huyo kuimba na kufuatisha baadhi ya mistari ya rap.
Akizungumzia tukio hilo, Rocky alisema mwanaye anaonekana kuwa tayari kushiriki katika matukio makubwa na kwamba ana udadisi mkubwa kuhusu muziki.
FAMILIA YA RIHANNA NA A$AP ROCKY
Rihanna na A$AP Rocky wana watoto watatu kwa pamoja. Mbali na Riot Rose, wanaye pia RZA Athelston Mayers mwenye umri wa miaka minne na binti yao Rocki mwenye umri wa miezi 14.
Rocky alisema anafurahia kuona watoto wake wakianza kumtambua kama mwanamuziki na kuzoea kumuona jukwaani, lakini akatania kuwa bado hawajafahamu ukubwa wa umaarufu wa mama yao, Rihanna, ambaye ni mmoja wa mastaa wakubwa duniani.
Kwa sasa, kuonekana kwa Riot Rose kwenye majalada sita ya Arena Homme+ ni hatua nyingine inayomuweka mtoto huyo kwenye uangalizi wa dunia ya burudani na mitindo, huku wazazi wake wakiendelea kumjivunia katika hatua zake za kukua.
