
Msanii mkongwe wa Bongo Fleva, Pasha, aliyewahi kujipatia umaarufu kupitia wimbo wake wa ‘Ni Soo’, amefunguka kuhusu changamoto alizokutana nazo katika safari yake ya muziki miaka ya nyuma, akieleza namna ilivyokuwa vigumu kwa wasanii kupata huduma za kurekodi nyimbo kutokana na uchache wa studio, hususan katika mikoa mbalimbali nchini.
Akizungumza katika kipindi cha KONTENA kinachorushwa na Global TV, Pasha amesema kipindi hicho wasanii wengi waliokuwa nje ya Dar es Salaam walilazimika kusafiri hadi jijini humo ili kupata huduma za kurekodi nyimbo zao.
Ameeleza kuwa hali hiyo ilisababisha ushindani mkubwa katika kupata nafasi za kurekodi, huku wasanii wakilazimika kusubiri kwa muda mrefu kutokana na foleni ya wanamuziki waliokuwa wakihitaji huduma hizo katika studio chache zilizokuwepo.
Pasha amebainisha kuwa tofauti na ilivyo sasa, ambapo teknolojia imerahisisha upatikanaji wa vifaa na huduma za kurekodi muziki, kipindi hicho kufanya wimbo kulihitaji maandalizi, gharama na uvumilivu mkubwa.
Hata hivyo, amesema pamoja na changamoto hizo, kipaji, ubora wa kazi na uwezo wa msanii kuwasilisha muziki wenye mvuto ndivyo vilivyokuwa na nafasi kubwa katika kumjengea jina na kumfanya akubalike kwa mashabiki.
Kupitia mahojiano hayo, Pasha ameeleza pia mabadiliko mbalimbali aliyoyashuhudia katika tasnia ya Bongo Fleva, akilinganisha mazingira ya muziki wa zamani na hali ilivyo katika kizazi cha sasa.
Simulizi yake imeibua kumbukumbu za safari ya muziki wa Bongo Fleva, hasa kipindi ambacho wasanii walihitaji kujituma zaidi ili kurekodi, kusambaza na kutambulisha kazi zao kwa mashabiki.