Mama mzazi wa Hayati John Pombe Magufuli, Bi. Suzana Magufuli, anatarajiwa kuzikwa siku ya Ijumaa katika makaburi ya familia yaliyopo nyumbani kwao wilayani Chato mkoani Geita Region.
Akizungumza msemaji wa familia ambaye pia ni mtoto wa saba katika familia hiyo, Gorodian Magufuli, amesema marehemu alikuwa akisumbuliwa na ugonjwa wa kupooza tangu mwaka 2018.
Kwa mujibu wa Gorodian, hali ya Bi. Suzana ilibadilika Mei 25, 2026 ambapo alipelekwa katika Hospitali ya Rufaa ya Kanda Chato kwa matibabu kabla ya kurudishwa nyumbani baada ya kuonekana kupata nafuu. Hata hivyo, hali yake ilikuja kuwa mbaya zaidi na baadaye alifariki dunia majira ya jioni.
Familia imesema marehemu atakumbukwa kwa upendo wake mkubwa kwa familia na jamii pamoja na malezi aliyowapa watoto wake, ikiwa ni pamoja na kuwafundisha kushirikiana katika majukumu ya nyumbani bila ubaguzi.
Mkuu wa Mkoa wa Geita Region, Martine Shigela, amefika nyumbani kwa familia ya Hayati Magufuli wilayani Chato kwa ajili ya kutoa pole na kushiriki katika shughuli za msiba huo.
Akizungumza na familia hiyo, Shigela amesema Rais wa Tanzania, Samia Suluhu Hassan, ameielekeza Serikali kugharamia taratibu zote za mazishi ya Bi. Suzana Magufuli.
Aidha, Shigela amempongeza Rais Samia kwa kuendelea kuonyesha ushirikiano kwa familia ya Hayati Magufuli, akitolea mfano kukamilishwa kwa ujenzi wa Parokia ya Mtakatifu Yohana Maria Muzeyi iliyopo Mlimani katika Jimbo Katoliki la Rulenge–Ngara, moja ya miradi iliyokuwa ndoto ya Hayati Magufuli.
