DUBAI – Marekani na Iran zinatajwa kuwa karibu kufikia makubaliano muhimu baada ya ripoti ya Axios kueleza kuwa pande hizo mbili zimekubaliana rasimu ya Hati ya Makubaliano (MoU) inayolenga kufungua tena mara moja Mlango wa Bahari wa Hormuz bila kutozwa ushuru.
Kwa mujibu wa ripoti hiyo, Iran pia itanufaika na kuondolewa kwa baadhi ya vikwazo vya kiuchumi kulingana na kiwango chake cha utekelezaji wa makubaliano hayo.
Makubaliano hayo yanatarajiwa kuongeza muda wa usitishaji mapigano kwa siku 60, ikiwemo nchini Lebanon, huku kipindi hicho kikitumika kuendeleza mazungumzo kuhusu mpango wa nyuklia wa Iran. Hata hivyo, hatua zozote za moja kwa moja kuhusu shughuli za nyuklia zitahitaji makubaliano mengine ya kina yatakayofuata baadaye.
Marekani na Iran zimekubaliana maandishi ya mkataba huo, alisema mwanadiplomasia kutoka moja ya nchi zinazopatanisha mazungumzo hayo, ingawa alikiri kuwa bado unahitaji idhini ya mwisho kutoka kwa viongozi wa juu.
Rais wa Marekani Donald Trump alisema makubaliano yanaweza kusainiwa ndani ya siku chache zijazo na kwamba mazungumzo hayo yamewasilishwa kwa viongozi wa juu wa Iran na kupata uungwaji mkono.
Trump pia alidai kuwa alisitisha mashambulizi yaliyokuwa yamepangwa dhidi ya Iran baada ya kuona maendeleo katika mazungumzo hayo, licha ya kuwa awali alikuwa ametishia kuchukua hatua kali dhidi ya sekta ya mafuta na gesi ya Iran.
Hata hivyo, msemaji wa Wizara ya Mambo ya Nje ya Iran, Esmaeil Baqaei, alisema Tehran bado haijafikia uamuzi wa mwisho kuhusu makubaliano hayo.
Alieleza kuwa sehemu kubwa ya maandishi imekamilika lakini Marekani imekuwa ikibadilisha baadhi ya masharti na kuwasilisha madai mapya katika hatua za mwisho.
Ripoti hiyo pia inaeleza kuwa moja ya mapendekezo yaliyokubaliwa na Washington ni kuruhusu urani iliyorutubishwa kwa kiwango cha juu kupunguzwa ubora wake ndani ya Iran chini ya usimamizi wa wakaguzi wa Umoja wa Mataifa.
Iran imeendelea kusisitiza kuwa inapaswa kupata sehemu ya fedha zilizozuiwa mara tu makubaliano ya awali yatakaposainiwa, huku Marekani ikitaka fedha hizo kutolewa kwa awamu kulingana na utekelezaji wa masharti yaliyowekwa.
Iwapo makubaliano hayo yatakamilika, yataitwa Mkataba wa Islamabad, yakisimamiwa na Qatar pamoja na Pakistan ambazo zimekuwa zikisaidia juhudi za upatanishi kati ya pande hizo mbili.
Diplomasia inaendelea huku pande zote zikifanya juhudi za mwisho kuhakikisha mkataba huo unasainiwa na kuanza kutekelezwa katika siku chache zijazo.
