Mshindi wa Kombe la Dunia akiwa na Hispania, Rodri, amesema yuko tayari kuanza ukurasa mpya wa maisha yake ya soka baada ya kukamilisha uhamisho wake kutoka Manchester City kwenda Barcelona.
Kiungo huyo mwenye umri wa miaka 30 amesaini mkataba wa miaka minne na Barcelona, baada ya klabu hiyo kukubaliana na Manchester City kuhusu ada ya uhamisho inayokadiriwa kufikia pauni milioni 65 sawa na TSh bilioni 230–235.
Uhamisho huo unamrejesha Rodri katika soka la Hispania kwa mara ya kwanza tangu alipoondoka Atletico Madrid mwaka 2019.
“Nina furaha na msisimko mkubwa kuhusu hatua hii mpya katika maisha yangu ya soka. Ni changamoto mpya, nafasi ya kupata uzoefu tofauti na kuhisi tena ule msisimko,” Rodri alisema.
Rodri amesema amefurahia kujiunga na klabu yenye malengo makubwa kama Barcelona na anaamini anaweza kuchangia katika kufanikisha malengo ya timu hiyo msimu huu.
Kuhusu kufanya kazi chini ya kocha wa Ujerumani, Hansi Flick, Rodri amesema anaamini falsafa ya kocha huyo itamsaidia kukua zaidi kama mchezaji.
“Nina furaha kuwa na kocha ambaye naamini ataleta mengi katika maisha yangu ya soka. Ni mfumo ambao kwa kiasi fulani ni tofauti na niliowahi kuupitia, hivyo utanipa uzoefu na kunisaidia kukua kama mchezaji,” alisema.
Rodri anaondoka Manchester City baada ya kuitumikia klabu hiyo kwa misimu saba, akicheza mechi 298 na kushinda mataji 12 makubwa, yakiwemo mataji manne ya Premier League, mawili ya FA Cup, matatu ya EFL Cup na Ligi ya Mabingwa Ulaya mwaka 2023.
Misimu yake miwili ya mwisho Manchester City iliathiriwa na majeraha, lakini alirejea katika kiwango bora kwenye Kombe la Dunia la mwaka huu, ambako alichaguliwa kuwa mchezaji bora wa mashindano huku Hispania ikitwaa ubingwa huo kwa mara ya pili.
Katika ujumbe wake wa kuaga mashabiki wa Manchester City, Rodri alisema anaondoka akiwa na fahari kubwa kutokana na mafanikio waliyoyapata pamoja na kumbukumbu nyingi za kipekee.
Alisema Manchester haikumsaidia tu kukua kama mchezaji, bali pia kama binadamu, akieleza kuwa maisha yake binafsi yalijengwa kwa kiasi kikubwa akiwa katika jiji hilo.
Rodri pia alitaja matukio muhimu ya maisha yake akiwa Manchester, ikiwemo kumuona kaka yake akihitimu kutoka Manchester Metropolitan University na kumuona mpenzi wake akifanya kazi katika NHS.
“Manchester ilibadilisha maisha yangu yote,” Rodri alisema.
