Dar es Salaam — Yanga SC imeendelea na mwanzo mzuri wa msimu wa Ligi Kuu ya NBC 2026/27 baada ya kuibuka na ushindi wa mabao 4-1 dhidi ya Coastal Union katika mchezo uliopigwa Agosti 20, 2026 kwenye Uwanja wa KMC Complex, Mwenge, jijini Dar es Salaam.
Yanga ilianza mchezo kwa kasi huku ikitawala sehemu kubwa ya mchezo na kutengeneza mashambulizi kadhaa. Juhudi hizo zilizaa matunda dakika ya 34, baada ya Albert Kangwanda kufunga bao la kwanza na kuipa Yanga uongozi wa 1-0.
Kabla ya mapumziko, Yanga iliongeza bao la pili kupitia Maxi Nzengeli, aliyefunga katika dakika ya 45+4 na kuipeleka timu yake mapumziko ikiwa mbele kwa mabao 2-0.
Kipindi cha pili kilianza kwa Yanga kuendelea kushambulia, na dakika ya 49 Mudathiri akaongeza bao la tatu, hivyo kuifanya Yanga kuwa katika nafasi nzuri ya kuondoka na ushindi.
Coastal Union haikukata tamaa na iliendelea kutafuta njia ya kurejea mchezoni. Juhudi zao zilizaa matunda dakika ya 77 baada ya Gladi Kiala kufunga bao la kwanza kwa Coastal Union na kupunguza pengo kuwa 3-1.
Hata hivyo, Yanga iliendelea kulinda uongozi wake na katika dakika za mwisho za mchezo, Mohamed Hussein alifunga bao la nne dakika ya 90+5 na kukamilisha ushindi wa mabao 4-1.
Ushindi huo unaifanya Yanga kuanza vyema msimu wa Ligi Kuu 2026/27, ikiwa imeshinda michezo yake miwili ya mwanzo. Katika mchezo wake uliopita, Yanga iliifunga Namungo FC 3-1, kabla ya kupata ushindi mwingine dhidi ya Coastal Union.
Kwa matokeo hayo, Yanga imeendelea kuonyesha kiwango kizuri mwanzoni mwa msimu na kuweka msingi mzuri katika mbio za kutetea ubingwa wa Ligi Kuu.
Stori na Haika Urio | GPL – TUDACO
