ARUSHA: Makamu wa Rais wa Jamhuri ya Muungano wa Tanzania, Deogratius Ndejembi, ametembelea Hospitali ya Rufaa ya Mkoa wa Arusha, Mount Meru, kujionea hali ya utoaji wa huduma za afya pamoja na kusikiliza changamoto zinazowakabili wagonjwa na watumishi.
Baada ya kuwasili hospitalini hapo, Makamu wa Rais alipokelewa na viongozi na watumishi wa hospitali hiyo, ambapo alipatiwa taarifa kuhusu maendeleo, utendaji na huduma zinazotolewa.
Baadaye alitembelea wodi mbalimbali na kuzungumza na wananchi wanaopata matibabu katika hospitali hiyo.
Akiwa hospitalini hapo, Ndejembi aliwapa pole wagonjwa kutokana na changamoto za kiafya zinazowakabili na kuwafikishia salamu za Rais wa Jamhuri ya Muungano wa Tanzania, Samia Suluhu Hassan.
Makamu wa Rais amesema Serikali itaendelea kuipa sekta ya afya kipaumbele kwa lengo la kuboresha huduma na kuhakikisha wananchi wanapata matibabu yenye ubora katika vituo vya afya nchini.
Katika Wodi ya Wazazi, Ndejembi alieleza kufurahishwa kuwaona akina mama waliojifungua salama pamoja na watoto wao wakiwa katika hali nzuri kiafya.
Amesema Serikali itaendelea kuimarisha huduma za afya ya mama na mtoto ikiwa ni sehemu ya juhudi za kupunguza vifo vitokanavyo na uzazi pamoja na vifo vya watoto.
Aidha, amesisitiza umuhimu wa kuendelea kuboresha huduma za afya ya uzazi na kuhakikisha huduma hizo zinawafikia wanawake na watoto katika maeneo mbalimbali nchini.
Ziara hiyo pia ilimpa Makamu wa Rais fursa ya kuzungumza ana kwa ana na baadhi ya wagonjwa kuhusu huduma wanazopata na changamoto wanazokutana nazo.
Makamu wa Rais amesema Serikali itaendelea kuchukua hatua za kuboresha upatikanaji na ubora wa huduma za afya nchini.
