Mfanyabiashara maarufu na shabiki kindakindaki wa Klabu ya Simba, Azim Dewji, amezungumzia mwenendo wa mshambuliaji wa timu hiyo, Ibrahim Doumbia, ambaye ameendelea kukabiliwa na changamoto ya kutumia vizuri nafasi za kufunga mabao.
Doumbia, ambaye leo amepewa heshima kubwa na klabu hiyo, bado amekuwa akikosolewa kutokana na kushindwa kutumia baadhi ya nafasi za wazi anazozipata, hali inayoendelea kuwaumiza vichwa mashabiki wa Simba wanaotegemea kuona safu yao ya ushambuliaji ikiwa na makali zaidi.
Hali hiyo imeibua mijadala miongoni mwa mashabiki wa Wekundu wa Msimbazi, huku baadhi yao wakionyesha kutoridhishwa na kiwango cha mshambuliaji huyo, licha ya kuendelea kupewa nafasi ya kuonyesha uwezo wake.
Kwa upande mwingine, shabiki kindakindaki wa Simba, Kay Mziwanda, amezua gumzo baada ya kumkataa Doumbia kwa utani na kuvunja ahadi yake ya kutaka kuolewa na mshambuliaji huyo, kufuatia kuendelea kukosa nafasi za wazi za kufunga mabao.
Kauli hiyo ya Kay imeongeza vicheko miongoni mwa mashabiki, ikionyesha namna ambavyo kukosa mabao kwa Doumbia kumekuwa kukiwapa presha mashabiki wa Simba, huku wengine wakigeuza hali hiyo kuwa sehemu ya mizaha yao mitandaoni.
Sasa swali linabaki kuwa, je, Doumbia ataweza kubadili mwenendo wake na kurejesha imani ya mashabiki wa Simba kwa kutumia vizuri nafasi anazopata, au ataendelea kuwa gumzo kutokana na nafasi anazozipoteza?
Mashabiki wa Simba wanaendelea kusubiri majibu ndani ya uwanja, ambako mabao ndiyo yatakayoweza kunyamazisha wakosoaji na kumrudishia mshambuliaji huyo heshima mbele ya Wanasimba.
