MAREKANI imeonya makampuni ya usafirishaji duniani kwamba yanaweza kukabiliwa na vikwazo vya kiuchumi iwapo yataendelea kufanya malipo kwa Iran ili kuruhusiwa kupita salama katika Mlango wa Strait of Hormuz.
Kwa mujibu wa taarifa ya Ofisi ya Kudhibiti Mali za Kigeni ya Marekani (OFAC) iliyotolewa Ijumaa, hatua hiyo inalenga kudhibiti kile inachokiita mfumo wa “ushuru” unaotumiwa na Iran kwa meli zinazopita katika eneo hilo muhimu la kimkakati.
OFAC imesema makampuni yanaweza kuadhibiwa hata kama malipo hayo yanafanyika kwa njia mbalimbali ikiwemo fedha taslimu, mali za kidijitali, ubadilishanaji wa huduma au hata michango isiyo ya moja kwa moja.
Onyo hilo linaeleza kuwa hatari za vikwazo zipo bila kujali njia ya malipo inayotumika, iwapo inalenga kupata ruhusa ya kupita katika eneo linalodhibitiwa na Iran.
Takribani asilimia 20 ya biashara ya mafuta na gesi duniani hupitia katika Strait of Hormuz, na hivyo kufanya eneo hilo kuwa muhimu sana kwa uchumi wa dunia.
Ripoti zinaeleza kuwa mvutano umeongezeka baada ya Iran kuzuia au kushambulia baadhi ya meli kufuatia mzozo wake na Marekani na Israel, hatua ambayo imeathiri usafirishaji wa nishati kimataifa.
Marekani pia imeripotiwa kuweka vizuizi vya baharini vinavyozuia baadhi ya meli za Iran kutoka bandari, hatua inayolenga kupunguza mapato ya mafuta ya Tehran.
Rais wa Marekani Donald Trump amenukuliwa akikataa mapendekezo ya Iran ya kumaliza vita vinavyoendelea, akisema hana kuridhishwa na msimamo wa uongozi wa Iran.
Hali ya taharuki inaendelea licha ya pande zote mbili kuripoti kuwepo kwa mazungumzo ya siri na ya kidiplomasia kupitia wapatanishi wa kikanda, huku mataifa makubwa yakihofia athari kwa uchumi wa dunia.
Wachambuzi wanasema mgogoro huo unaweza kuendelea kuongeza bei ya mafuta na kusababisha changamoto zaidi katika minyororo ya usambazaji duniani.
