Babati, Manyara – Kwa miaka mingi wananchi wa Kijiji cha Kiru Six, Kata ya Kiru, Wilaya ya Babati mkoani Manyara wamekuwa wakikabiliwa na changamoto kubwa ya upatikanaji wa huduma za afya kutokana na uchakavu wa miundombinu ya Zahanati ya Kiru ambayo ndiyo imekuwa tegemeo lao kuu.
Hali ya zahanati hiyo imeendelea kuwa duni kwa muda mrefu, ikiwa na majengo yaliyochakaa, paa lenye matundu makubwa, kuta zenye nyufa pamoja na sakafu iliyoharibika katika maeneo mbalimbali. Wananchi wanasema hali hiyo imekuwa ikiathiri utoaji wa huduma za afya na kuongeza ugumu wa kupata matibabu kwa wakati.
Mbali na uchakavu wa jengo, wananchi wa eneo hilo pia wamekuwa wakikabiliwa na changamoto ya huduma za afya nyakati za usiku kutokana na ukosefu wa umeme wa uhakika. Zahanati hiyo imekuwa ikitegemea mfumo wa nishati ya jua ambao hauwezi kukidhi kikamilifu mahitaji ya huduma za usiku.
Aidha, wananchi wameeleza kuwepo kwa changamoto za upatikanaji wa baadhi ya vifaa tiba, huduma muhimu za matibabu pamoja na uhaba wa maji, hali inayochangia ugumu wa utoaji wa huduma kwa wagonjwa.
Changamoto hizo zimekuwa kubwa zaidi kwa wanawake wajawazito ambao mara nyingi hulazimika kusafiri umbali mrefu kufuata huduma za afya ya uzazi katika maeneo mengine, jambo linaloongeza gharama na wakati mwingine kuhatarisha afya ya mama na mtoto.
Kwa upande wa watumishi wa afya, mazingira ya kazi yameendelea kuwa magumu kutokana na uchakavu wa miundombinu na uhaba wa baadhi ya mahitaji muhimu. Pia, changamoto ya makazi imekuwa ikiwalazimu baadhi ya watumishi kuishi mbali na eneo la kazi, hali inayopunguza uwezo wa kutoa huduma za dharura nyakati za usiku.
Hata hivyo, baada ya miaka mingi ya changamoto, matumaini mapya sasa yanaanza kuonekana kwa wananchi wa Kiru Six baada ya Serikali kuanza ujenzi wa Kituo cha Afya cha Kiru ambacho kwa sasa kimefikia asilimia 98 ya utekelezaji.
Mradi huo wenye thamani ya zaidi ya shilingi milioni 200 unatarajiwa kukamilika mwezi Julai mwaka huu na kuhudumia zaidi ya wananchi 9,000 wa Kata ya Kiru pamoja na vijiji vya jirani.
Kituo hicho kipya kinatarajiwa kuwa na miundombinu ya kisasa, huduma za saa 24, umeme wa uhakika pamoja na mazingira bora kwa wagonjwa na watumishi wa afya.
Mganga Mkuu wa Halmashauri ya Wilaya ya Babati, Dkt. Madama Hosea, amesema uwekezaji huo ni sehemu ya juhudi za Serikali za kuboresha huduma za afya kwa wananchi wa maeneo ya vijijini na kuhakikisha wanapata huduma bora karibu na makazi yao.
Habari za kukamilika kwa kituo hicho zimepokelewa kwa furaha na wananchi ambao wanaamini kuwa kitamaliza changamoto ya kusafiri umbali mrefu kutafuta huduma za afya.
Kukamilika kwa kituo hicho kunatarajiwa kuboresha huduma za matibabu, kuimarisha huduma za afya ya uzazi na watoto, pamoja na kuongeza uwezo wa watumishi wa afya kutoa huduma kwa ufanisi zaidi.
Kwa wananchi wa Kiru Six, ujenzi wa kituo hicho ni ishara ya mwisho wa safari ndefu ya changamoto za afya na mwanzo wa enzi mpya ya huduma bora za matibabu katika eneo hilo.
