Taharuki imezuka katika Kituo cha Mabasi ya kwenda Tegeta kilichopo eneo la Mwenge, Dar es Salaam, baada ya boksi ambalo bado halijafahamika lina nini ndani yake kukutwa likiwa limetelekezwa.
Mwenyekiti wa Mtaa wa Mlalakuwa, Suleiman Masare, amesema boksi hilo lilitelekezwa tangu jioni ya Jumatano, Agosti 5, 2026, jambo lililozua hofu miongoni mwa wananchi waliokuwa wakipita na kutumia kituo hicho.
Kutokana na hali hiyo, Jeshi la Polisi lilifika eneo la tukio na kuanza taratibu za usalama kabla ya kulichukua boksi hilo kwa ajili ya uchunguzi.
Boksi hilo limepelekwa katika Kituo cha Polisi Mabatini, Kijitonyama, ambako uchunguzi unaendelea ili kubaini kilichomo ndani yake.
Jeshi la Polisi limesema litatoa taarifa rasmi kwa umma kuhusu matokeo ya uchunguzi baada ya kukamilisha taratibu za kulifungua na kuchunguza boksi hilo.
Wananchi wameendelea kusubiri taarifa za mamlaka huku wakihimizwa kutulia na kuepuka kusambaza taarifa zisizothibitishwa kuhusu tukio hilo.
