Rais wa Iran, Masoud Pezeshkian, amesema kuwa licha ya changamoto za mawasiliano na Kiongozi Mkuu wa Iran, Mojtaba Khamenei, bado anaendelea kutekeleza majukumu yake ya uongozi na kutoa maelekezo muhimu kwa viongozi wa serikali.
Kauli hiyo imekuja kufuatia taarifa zinazoendelea kuzua mjadala kuhusu hali ya Mojtaba Khamenei, ambaye ameripotiwa kujeruhiwa katika shambulio la pamoja la Marekani na Israel mwezi Februari 2026. Shambulio hilo pia lilisababisha kifo cha aliyekuwa Kiongozi Mkuu wa Iran, Ayatollah Ali Khamenei, na baadaye Mojtaba akachukua nafasi ya baba yake.
Tangu achukue madaraka, Mojtaba hajaonekana hadharani, hali iliyozua maswali kuhusu afya yake na uwezo wake wa kuiongoza Iran. Kutokuwepo kwake kulionekana zaidi wakati hakuhudhuria mazishi ya baba yake yaliyofanyika Julai 2026.
Akizungumzia hali hiyo, Rais Pezeshkian alisema mawasiliano ya moja kwa moja na Mojtaba yamekuwa magumu, lakini bado wamekuwa wakibadilishana ujumbe kupitia maandishi na kufanya mazungumzo yenye tija kuhusu masuala muhimu ya taifa.
Alisisitiza kuwa Mojtaba Khamenei anaendelea kuwa na ushawishi mkubwa katika uongozi wa Iran na kwamba maamuzi muhimu yanaendelea kutolewa chini ya uongozi wake.
Pezeshkian pia alikosoa wanaoeneza taarifa zinazodai kuwa kutokuwepo kwa Mojtaba hadharani ni ishara ya kushindwa kuongoza, akisema baadhi ya watu wanatumia hali hiyo kuunda taswira isiyo sahihi kuhusu uongozi wa nchi.
Kauli hiyo imekuja wakati Iran ikiendelea kukabiliwa na changamoto za kisiasa na kiusalama, huku macho ya jumuiya ya kimataifa yakielekezwa katika mwenendo wa uongozi wa taifa hilo baada ya mabadiliko makubwa yaliyotokea mapema mwaka huu.
