WASHINGTON: Rais wa Marekani, Donald Trump, amesema anaamini Iran huenda ilihusika na ajali ya ndege ya FlyDubai na pia huenda ikawa nyuma ya tishio la usalama lililosababisha ndege za Marekani zenye uwezo wa kubeba mabomu kuondolewa katika kituo cha kijeshi cha RAF Fairford nchini Uingereza.
Kauli hiyo inakuja wakati viongozi wengine wa utawala wa Trump wakichukua msimamo wa tahadhari zaidi kuhusu madai hayo.
Makamu wa Rais wa Marekani, J.D. Vance, amesema bado hakuna ushahidi wa uhakika unaoihusisha Iran na ajali ya FlyDubai. Kwa upande wake, Waziri wa Mambo ya Nje, Marco Rubio, amesema kuhamishwa kwa ndege hizo huenda kulikuwa sehemu ya utaratibu wa kawaida wa kubadilishana wanajeshi na vifaa vya kijeshi.
Akizungumza na waandishi wa habari nje ya Ikulu ya White House Jumatatu, Trump amesema kuondolewa kwa ndege hizo kutoka RAF Fairford hakukutokea kwa bahati mbaya, bali kulichochewa na taarifa kuhusu kile alichokiita “tishio mahususi.”
“Tulipokea taarifa za vitisho, hivyo hatukuona sababu ya kuendelea kuziweka ndege hizo hapo. Tukazihamisha kama hatua ya tahadhari,” amesema Trump.
Trump ameongeza kuwa Marekani inawafahamu watu waliohusika na tishio hilo, ingawa hakuwataja kwa majina.
Alipoulizwa iwapo tishio hilo linaweza kuwa linahusiana na Iran, Trump alijibu: “Linaweza kuhusishwa na Iran.”
Kauli hiyo inaendana na ripoti za baadhi ya vyombo vya habari vya Marekani zilizodai kuwa taarifa mpya za kiusalama zilichangia uamuzi wa kuondoa ndege hizo katika kituo hicho cha Uingereza.
Hatua hiyo imechukuliwa pia baada ya tukio la Septemba 27, ambapo polisi walichunguza magari matatu yaliyokuwa yakitiliwa shaka karibu na RAF Fairford.
Hata hivyo, tofauti katika kauli za viongozi wa Marekani zinaonyesha kuwa hakuna msimamo mmoja wa wazi kuhusu iwapo Iran ilihusika moja kwa moja na tishio hilo au matukio mengine yaliyotajwa.
Wakati Trump akisema Iran huenda inahusika, Vance na Rubio wamekuwa wakisisitiza umuhimu wa kuwa na ushahidi wa kutosha kabla ya kuhusisha Tehran moja kwa moja na matukio hayo.
