Maafisa wa kijeshi wa Marekani wamesema kuwa Iran imefanya mashambulizi zaidi ya mara 10 dhidi ya vikosi vya Marekani tangu makubaliano ya kusitisha mapigano (ceasefire) yalipoanza tarehe 8 Aprili.
Kwa mujibu wa mwenyekiti wa Majeshi ya Pamoja ya Marekani, Gen. Dan Caine, Iran pia imehusika katika mashambulizi dhidi ya meli za biashara mara tisa, imekamata meli mbili za mizigo, na kushambulia vikosi vya Marekani mara 10 katika eneo la Strait of Hormuz.
Caine amesema kuwa ingawa matukio hayo ni ya hatari, bado hayajafikia kiwango cha kusababisha kurejea kwa vita kubwa, lakini yanaendelea kuongeza wasiwasi mkubwa kuhusu usalama wa usafiri wa baharini katika eneo hilo muhimu duniani.
Ameeleza pia kuwa mashambulizi ya Iran kwa kutumia makombora, droni na boti ndogo dhidi ya vikosi vya Marekani yamefanikiwa kuzuiwa na ulinzi wa kijeshi, ikiwemo helikopta za kivita za Marekani zilizo katika doria ya kudumu.
Kwa sasa, takribani mabaharia 22,500 walioko kwenye meli 1,550 za biashara wamesalia wakishindwa kupita katika Ghuba hiyo kutokana na hali ya usalama kuwa tete na hatari kubwa ya mashambulizi.
Maafisa wa Marekani wanadai kuwa Iran inatumia vitisho na mashambulizi dhidi ya meli za biashara kama njia ya kuathiri uchumi wa dunia, wakieleza hatua hiyo kama jaribio la “kuweka uchumi wa kimataifa mateka”.
Waziri wa Ulinzi wa Marekani, Pete Hegseth, amesema Marekani haitafuti vita, lakini haitakubali nchi yoyote kuzuia uhuru wa usafirishaji katika njia za kimataifa za baharini.
Amefafanua kuwa operesheni mpya iitwayo “Project Freedom” imeanzisha ulinzi mkali wa anga na bahari katika eneo hilo, ikiwa na lengo la kulinda meli za biashara na kuhakikisha usafiri unaendelea bila vikwazo.
Marekani pia imedai kuwa imezuia na kuelekeza meli kadhaa za Iran kupitia ulinzi wake mkali, ikisisitiza kuwa operesheni hiyo inalenga pia kulinda uchumi wa dunia na kuhakikisha upatikanaji wa bidhaa hauzuiwi, hasa kwa nchi maskini.
Hali katika eneo la Strait of Hormuz bado ni ya wasiwasi mkubwa, huku mvutano kati ya mataifa hayo ukionekana kuendelea kuongezeka na kuibua hofu ya mzozo mpana zaidi wa kimataifa.
