Furaha kubwa ilitawala ndani ya kambi ya Arsenal baada ya timu hiyo kutangazwa rasmi kuwa mabingwa kufuatia Manchester City kushindwa kupata ushindi katika mchezo wao dhidi ya Brighton.
Arsenal walikuwa tayari wamefanya kazi yao mapema baada ya kuichapa Burnley siku ya Jumatatu, hali iliyoweka presha kubwa kwa Manchester City ambao walihitaji ushindi ili kuendelea kusubiri hatima ya ubingwa hadi mchezo wa mwisho wa msimu.
Hata hivyo, matumaini ya City yalififia baada ya kulazimishwa sare ya bao 1-1 kwenye mchezo uliochezwa kusini mwa England, matokeo yaliyowapa Arsenal ubingwa rasmi wa ligi.
Kocha Mikel Arteta alikuwa amewakusanya wachezaji wake wote katika uwanja wa mazoezi wa Colney kufuatilia mchezo huo kwa pamoja, jambo ambalo liligeuka kuwa usiku wa kihistoria kwa klabu hiyo.
Baada ya kipenga cha mwisho, wachezaji wa Arsenal walilipuka kwa furaha huku wakikumbatiana, kuruka juu na kushangilia kwa nguvu baada ya kuthibitishwa kuwa mabingwa.
Kiungo Declan Rice aliweka picha kwenye ukurasa wake wa Instagram akiwa na baadhi ya wachezaji wenzake huku akiandika: “Niliwaambia wote… kazi imekwisha.”
Miongoni mwa waliompongeza nyota huyo kwenye mtandao huo ni pamoja na mshambuliaji wa zamani wa Chelsea Alexandre Pato pamoja na mwanamuziki maarufu Jess Glynne.
Video za shamrashamra hizo pia zilisambaa haraka mtandaoni zikionyesha mastaa wa Arsenal wakisherehekea kwa hisia kali. Bukayo Saka na Gabriel walionekana wakikumbatiana kwa nguvu huku Riccardo Calafiori akionekana karibu kumbeba William Saliba kutokana na furaha.
Beki Jurrien Timber naye alichapisha video ikimuonyesha mmoja wa viongozi wa klabu akibebwa juu na wafanyakazi pamoja na wachezaji wakati wa shangwe hizo kubwa.
Ubingwa huo unaweka historia mpya kwa Arsenal chini ya Mikel Arteta ambaye ameiongoza timu hiyo kurejea kileleni baada ya miaka mingi ya kusubiri mafanikio makubwa ya ligi.
