Mfanyabiashara maarufu na mwanamitandao Jennifer Jovin, maarufu kama Niffer ameibua mjadala mitandaoni baada ya kueleza kuguswa na ukimya wa mwanamitindo na mwigizaji Idris Sultan, huku akieleza kumkosa kutokana na kupungua kwa mwonekano wake kwenye mitandao ya kijamii.
Niffer, kupitia akaunti yake ya Instagram, ameonesha wasiwasi wake kuhusu mabadiliko anayoyaona kwa Idris, akieleza kuwa amekuwa akimkosa Idris mwenye uchangamfu, nguvu na furaha ambayo mashabiki wake wameizoea kwa muda mrefu.
Katika ujumbe wake, Niffer amesema namna Idris anavyoweka machapisho yake siku za hivi karibuni si kama ilivyokuwa awali, huku akibainisha kuwa mwigizaji huyo haonekani mara kwa mara kama ilivyozoeleka.
“Idriss Sultan, we miss you. Come back soon bro. I mean the real energetic YOU,” ameandika Niffer, akisisitiza kuwa anatamani kumuona Idris akifurahia maisha, akiburudika na kushiriki zaidi na mashabiki wake.
Aidha, Niffer amewahakikishia Idris na mashabiki wake kuwa bado wapo wanaompenda na kumtakia mema, akimhimiza kurejea katika uchangamfu ambao wengi wameuzoea.
Ujumbe huo umeibua mjadala kuhusu ukimya wa Idris Sultan na kupungua kwa mwonekano wake kwenye mitandao ya kijamii. Hata hivyo, maelezo ya Niffer yanaakisi hisia na wasiwasi wake binafsi, na hayathibitishi kuwa Idris anakabiliwa na changamoto yoyote katika maisha yake.
Kwa sasa, kinachoonekana wazi kupitia ujumbe huo ni namna mashabiki na watu wanaomfuatilia Idris wanavyotamani kumuona akirejea kushiriki zaidi maisha yake na kuendelea kuwapa burudani kama ilivyokuwa awali.
