Pep Guardiola Azungumzia Mauaji Marekani, Israel, Ukrane – Video

Pep Guardiola amesema atatumia nafasi yake kama mmoja wa watu wanaosikilizwa zaidi duniani kuzungumzia “maumivu” anayohisi kuhusu waathiriwa wa migogoro ya kimataifa, akisisitiza kuwa hawezi kukaa kimya anapoona mateso ya raia wasio na hatia, hususan watoto.

Meneja huyo wa Manchester City aliyasema hayo alipokuwa akizungumza na waandishi wa habari kabla ya mchezo wa marudiano wa nusu fainali ya Kombe la Carabao dhidi ya Newcastle, siku moja baada ya kutoa kauli yenye hisia kali kuhusu watoto wa Kipalestina katika tamasha la hisani lililofanyika Barcelona.

Guardiola alisema video na picha za migogoro kutoka sehemu mbalimbali za dunia “zinamuumiza” na haziwezi kumuacha bila kuguswa. Alitaja wazi migogoro inayoendelea Palestina, Ukraine na Sudan, pamoja na mauaji ya hivi karibuni nchini Marekani yaliyohusisha maafisa wa Uhamiaji na Forodha (ICE).

“Inaniuma. Nitazungumza siku zote,” alisema Guardiola. “Kuua maelfu ya watu wasio na hatia? Inaniuma.”

Aliongeza: “Unapoona picha kila siku — baba, mama, watoto — yanayowatokea, maisha yao yakiharibiwa, na watu hawawezi kuguswa hata kidogo? Samahani, siwezi kuacha kuguswa.”

Alipoulizwa kwa nini masuala haya ni ya muhimu sana kwake binafsi, kocha huyo raia wa Uhispania alisema anashukuru hata kuulizwa swali hilo, akidokeza kuwa mara chache vyombo vya habari hujadili mada kama hizo.

“Nashukuru kwa sababu ni mara ya kwanza katika miaka 10 kwa mwandishi wa habari mmoja kuniuliza kuhusu hilo,” alisema. “Inaonekana ninyi [vyombo vya habari] hamruhusiwi kuzungumza kwa sababu ya kazi yenu.”
Guardiola alisisitiza kuwa dunia haijawahi kushuhudia kiwango kikubwa cha taarifa kama ilivyo sasa, akisema ukatili unaonekana waziwazi kupitia picha na video.

“Hatujawahi katika historia ya binadamu kuwa na taarifa mbele ya macho yetu tukizitazama kwa uwazi zaidi kuliko sasa — yaliyo Palestina, yaliyotokea Ukraine, yaliyotokea kote ulimwenguni, Sudan, kila mahali,” alisema.

Kauli za Guardiola zinakuja wakati Israel inakabiliwa na shutuma za kufanya mauaji ya halaiki dhidi ya Wapalestina, kama ilivyobainishwa katika ripoti ya Umoja wa Mataifa mwaka jana, ingawa Israel imekanusha vikali madai hayo. Ripoti za hivi karibuni pia zimedai kuwa maafisa wa Israel wamekubali idadi kubwa ya vifo vya raia huko Gaza.
Aidha, Guardiola alirejelea tukio la hivi majuzi nchini Marekani ambapo raia wawili wa Marekani, Renee Good na Alex Pretti, walipigwa risasi na kuuawa na maafisa wa serikali wakati wa oparesheni kali dhidi ya wahamiaji mjini Minneapolis.

“Kwa mtazamo wangu, haki lazima izungumzwe,” alisema. “Tazama kilichotokea Marekani. Renee Good na Alex Pretti wameuawa. Niambie unawezaje kutetea hilo?”
Hata hivyo, alikiri kuwa hakuna jamii au mtu aliyekamilika, akisisitiza umuhimu wa kujitathmini na kufanya juhudi za pamoja kuboresha dunia.
“Hakuna jamii kamilifu, hakuna mahali palipo kamilifu, mimi si mkamilifu,” alisema. “Tunapaswa kufanya kazi ili tuwe bora zaidi.”