Rais SamiAwatunuku Shahada ya Kwanza ya Sayansi ya Kijeshi Wahitimu 106 wa TMA Monduli – (Video +Picha)
Rais wa Jamhuri ya Muungano wa Tanzania na Amiri Jeshi Mkuu, Mhe. Dkt. Samia Suluhu Hassan, ameongoza mahafali ya Chuo cha Mafunzo ya Kijeshi (Tanzania Military Academy – TMA) Monduli, Arusha, na kuwatunuku Shahada ya Kwanza ya Sayansi ya Kijeshi jumla ya wahitimu 106. Mahafali hayo yamefanyika tarehe 22 Novemba, 2025 na kuhudhuriwa na viongozi mbalimbali wa Serikali na Jeshi la Ulinzi la Wananchi wa Tanzania (JWTZ).
Akizungumza katika hafla hiyo, Mhe. Rais Samia amepongeza wahitimu kwa kukamilisha mafunzo yao, akisisitiza kuwa taaluma ya kijeshi inahitaji uzalendo, maadili, weledi na utii kwa taifa. Amesema kuwa Serikali itaendelea kuwekeza katika mafunzo ya kijeshi na kuboresha miundombinu ya vyuo vya mafunzo ili kuendana na mahitaji ya usalama wa kisasa.
Aidha, Rais Samia ameongeza kuwa wahitimu wa leo ni sehemu muhimu ya kizazi kipya cha maafisa watakaolinda na kutetea masilahi ya nchi, akiwataka kutumia maarifa na ujuzi waliopata kuimarisha ulinzi na usalama wa taifa, pamoja na kutoa mchango chanya katika majukumu ya kimataifa yanayotekelezwa na JWTZ.
Kwa upande wao, viongozi wa TMA wamemshukuru Rais na Amiri Jeshi Mkuu kwa uongozi wake na kwa kuendelea kulipa kipaumbele suala la mafunzo ya kijeshi. Wameeleza kuwa shahada hizo ni uthibitisho wa ubora wa mitaala ya kijeshi nchini na matokeo ya juhudi za Serikali katika kuhakikisha Jeshi linakuwa na wataalam waliobobea.
Mahafali hayo yamehitimishwa kwa burudani mbalimbali za kijeshi, gwaride maalum na kuapishwa kwa wahitimu kama maafisa wapya wa JWTZ, wakiahidi kulitumikia taifa kwa uaminifu, uadilifu na uhodari.
