Rais wa Ufaransa, Emmanuel Macron, na mkewe Brigitte Macron, wamefungua kesi ya madai ya uchafuzi wa jina dhidi ya mtangazaji maarufu wa Marekani, Candace Owens. Kesi hiyo iliwasilishwa rasmi katika Mahakama ya Delaware, Marekani, tarehe 23 Julai 2025.

Katika hati ya kesi hiyo, wanandoa hao wanadai kuwa Owens alieneza taarifa za uongo na za kudhalilisha kupitia mitandao ya kijamii na vipindi vyake vya mtandaoni, ikiwemo madai ya kwamba Bi. Brigitte alizaliwa mwanaume na baadaye kubadili jinsia, jambo ambalo wanalitaja kuwa la uzushi, la kuudhi, na linaloathiri heshima ya familia na taasisi ya urais wa Ufaransa.

Wakili wa familia ya Macron, Tom Clare, amesema kuwa hatua ya kufungua kesi ilikuwa chaguo la mwisho baada ya juhudi nyingi za kuwasiliana na Owens ili aondoe na kuomba radhi kwa taarifa hizo kushindikana. Kesi hiyo inadai fidia ya kifedha kwa madhara ya kiakili na kijamii, pamoja na fidia maalum kwa hasara ya heshima ya umma.

Candace Owens hajatoa tamko rasmi hadi sasa, ingawa baadhi ya machapisho yake ya hivi karibuni yanaonesha msimamo wa kutojutia yaliyosemwa, jambo ambalo linaweza kuathiri mwenendo wa kesi hiyo inayofuatiliwa kwa karibu kimataifa.

Kesi hii inazua mjadala mpana kuhusu mipaka ya uhuru wa kujieleza, heshima ya viongozi wa kitaifa, na athari za kampeni za habari za upotoshaji katika enzi ya mitandao ya kijamii.

Tufuatilie kupitia YouTube ya Global TV — usisahau ku-like, ku-comment na ku-subscribe ili uendelee kuhabarika kila siku kwa habari mbalimbali zenye ukweli na uhakika.