Balaa la Maandamano ya Wananchi Hong Kong

LICHA ya mvua kali iliyokuwa ikinyesha Hong Kong, umati wa watu, wakiwamo wazee, walijiunga na wanaharakati vijana na watu wengine wenye msimamo mkali kuandamana jana.

 

Waandaaji wanakadiria watu wasiopungua milioni mbili wanashiriki maandamano hayo, idadi ambayo ni kubwa zaidi kuwahi kushuhudiwa tangu mwaka 1997 katika maandamano jimboni humo.

 

Polisi imeruhusu watu wakusanyike, lakini wasiandamane, lakini waandamanaji wameipuuza amri hiyo na kushiriki kwa wingi mitaani katikati ya Hong Kong licha ya mvua kali.

“Ikiwa mbinu za Beijing na Hong Kong ni kuona vuguvugu letu linadhoofika, wamekosea, hatutachoka,” alisema Bonnie Leung wa shirika linalopigania haki za raia la CHRF.

 

Waandamanaji wanasema wamepania kuionyesha serikali kuwa hawataachana na madai yao matano ikiwa ni pamoja na kubatilisha muswada wa sheria kuhusu wahalifu kuhamishiwa China na uchunguzi huru kuhusu matumizi ya nguvu ya polisi.

 

Katika madai yao, waandamanaji hao wanadai pia kiongozi wa serikali ya jimbo hilo, Carrie Lam, ajiuzulu.

“Tutabakia hapahapa, tutasimama kidete hadi wanatujibu. Kwa pamoja tuna nguvu zaidi,” alisema mwanafunzi Harles Ho.

 

Kijana huyo wa miaka 20 alisema mvua kali haitobadilisha msimamo wao.

Wakati matumizi ya nguvu yaligubika maandamano yao wiki za hivi karibuni, waandaaji wa maandamano ya jana walitaraji kudhihirisha kwamba wakazi wa Hong Kong wanaweza kuandamana kwa amani.

 

Waandamanaji walikosolewa wiki hii baada ya maandamano katika uwanja wa ndege wa kimataifa kumalizikia kwa mapigano dhidi ya polisi wa kuzuia fujo.

Katika tukio hilo, waandamanaji hao waliwazuia abiria wasisafiri na baadaye kuwavamia watu wawili waliokuwa wakiwatuhumu kuwa majasusi wa serikali kuu ya China.

 

Picha hizo ziliichafua taswira ya waandamanaji hao na kusababisha baadhi ya waandaaji kuomba radhi.

Vuguvugu la maandamano lilianza Juni 9, mwaka huu katika jimbo hilo la Hong Kong lililokuwa zamani likisimamiwa na Uingereza.

Loading...

Toa comment