The House of Favourite Newspapers

ZIJUE SIKU UNAZOWEZA KUNASA UJAUZITO!

NIMEAMUA kuandika makala haya ili kujibu maswali ya wasomaji wa safu hii ambao wanahitaji kushika mimba na wameuliza kwa mfano mwezi huu alianza kuona siku zake tarehe 17 Juni, ni zipi siku zake za kushika mimba? Wengine wanauliza je, ukitaka mtoto wa kike ufanyeje?  Inafaa tufahamu kuwa ili kuweza kujua ni siku zipi za mwezi mwanamke anaweza kushika mimba inabidi tujue kwanza kipindi ambacho mwili wa mwanamke uko tayari kushika mimba au Ovulation Period. Ovulation ni wakati ambao yai lililokua hutoka katika mirija ya ovari katika kizazi cha mwanamke na katika wakati huu uwezo wake wa kushika mimba huwa ni mkubwa.

Kwa kawaida mwanamke huwa na mayai kadhaa katika ovari zake kwa wakati maalum wa mwezi, ambapo yai kubwa kuliko yote huondoka na kuelekea katika tumbo la uzazi kupitia mirija ya ovari. Ovulation haifuati mpangilio maalum kati ya ovari katika kila mwezi na haijulikani ni ovari gani itatoa yai kila mwezi. Wakati yai linapotoka huwa na uwezo wa kurutubishwa au kukutana na mbegu ya kiume na kuanza kutengeneza mtoto kwa muda wa saa 12 hadi 24, kabla halijapoteza uwezo wake.

Iwapo yai litafanikiwa kurutubishwa na mbegu ya kiume kwa wakati maalum na kujikita katika fuko la uzazi basi matokeo yake ni mimba, iwapo halitarutubisha yai hilo pamoja na kuta za kizazi, huharibika na kutoka nje ya mwili kama damu ya hedhi. Mzunguko wa mwezi ni siku ya kwanza unayopata damu yako ya hedhi hadi siku kabla ya kupata tena hedhi nyingine.

Ili kujua mzunguko huo vyema inatubidi tuchunguze hedhi yetu kwa miezi isiyopungua 6. Lakini kama una haraka na huwezi kuchunguza kwa miezi 6 chunguza kwa miezi mitatu. Unaweza kufanya hivyo kwa kutumia kalenda ya kawaida na kwa kuziwekea mduara kwa kalamu siku zako za mwezi, yaani siku ya kwanza ya kupata hedhi hadi siku ya mwisho kabla ya hedhi inayofuata.

Kwa mfano iwapo umepata siku zako Julai Pili na umepata tena siku zako tarehe 29 Julai, mzunguko wako ni wa siku 28. Kwa kawaida mzunguko wa siku 28 ndio mzunguko wa kawaida kwa wanawake walio wengi. Lakini kuna baadhi ya wanawake huwa na mzunguko wa chini ya siku 28 na wengine huwa na hadi siku 35.

Wakati wa Ovulation katika mzunguko wa mwezi huainishwa kwa kuhesabu siku au kitu kinaitwa luteal phase, katika mzunguko wako. Unaweza kujua muda wa Ovulation katika mzunguko wako wa mwezi kwa kutoa idadi ya siku za luteal phase. Katika kuhesabu huko utapata mzunguko mfupi na mrefu.

Chukua mzunguko mfupi wa mwezi na hesabu idadi ya siku katika mzunguko huo, toa 18 katika mzunguko huo na utapata idadi fulani. Halafu anza kuhesabu siku yako ya kwanza ya mzunguko wa hedhi katika mwezi unaofuata kwenda mbele hadi kufikia namba uliyopata, hivyo utaweza kupata siku ambayo una uwezekano mkubwa wa kubeba mimba.

Kwa mfano mzunguko wako mfupi ni siku 29, unatoa 18 katika 29 na unapata 11. Iwapo siku yako ya kuanza hedhi mwezi ujao ni Oktoba 3, ongeza siku 11 kuanzia siku hiyo. Hivyo siku ambayo una uwezekano mkubwa wa kubeba mimba itakuwa Oktoba 14.

Halafu chukua idadi ya siku za mzunguko wako mrefu wa hedhi. Toa siku 11 kutoka katika idadi ya siku za mzunguko huo na utapata namba fulani. Halafu tena anza kuhesabu katika mzunguko wako ujao wa hedhi kwenda mbele hadi kufikia siku ambayo una uwezekano wa kupata mimba.

Kwa mfano iwapo mzunguko wako mrefu ni siku 31, toa 11 katika mzunguko huo na utapata 20. Iwapo hedhi yako ijayo inaanza tarehe 3 Oktoba, ongeza siku 20 kuanzia siku hiyo na tarehe 23 Oktoba itakuwa siku yako ambayo una uwezekano mkubwa wa kubeba mimba. Kwa utaratibu huo utakuwa umepata kipindi cha kati ya Oktoba 14 hadi 23 ambacho ni siku ambazo una uwezekano mkubwa wa kubeba mimba.

Ovalation huweza kubadilika kidogo katika mzunguko wako wa hedhi kwa sababu huweza kucheleweshwa na sababu mbalimbali kama vile wasiwasi au msongo wa mawazo, ugonjwa, lishe au kufanya mazoezi. Kipindi cha kubeba mimba huanza siku 4 hadi 5 kabla ya Ovulation na humalizika saa 24 hadi 48 baada ya hapo, hii ni kwa sababu muda wa ovulation huweza kuchelewa au kuwahi kutokana na sababu mbalimbali. Pia kwa sababu mbegu ya kiume huwa na uhai kwa siku 4 hadi 5 na yai huweza kuishi kwa saa 24 hadi 48 baada ya kuingia katika tumbo la uzazi.

Hivyo kwa kujua siku hizo humsaidia mwanamke kufahamu kipindi chake cha Ovulation kimewadia na hivyo kuweza kukukuta na mumewe au mwenza wake wakati huo ili aweze kubeba mimba. Lakini pia wakati wa Ovulation huweza kutumika kama njia ya kuzuia mimba. Yaani kutojamiiana ‘siku hatari’.

Comments are closed.